भरतपुर । चितवन सहायता कोष युकेले अन्नपूर्णा सेकेन्डरी स्कुल भरतपुर–२१, पार्वतीपुरका कक्षा ११ र १२ मा अध्ययनरत विद्यार्थीलाई छात्रवृत्ति प्रदान गर्न एक लाख रुपैयाँको छात्रवृत्ति अक्षयकोष स्थापना गरेको छ ।
सो संस्थाको तर्फबाट अध्यक्ष रितेशराज पाण्डे, महासचिव रमेशकुमार श्रेष्ठ र पूर्वअध्यक्ष हिमाल गुरूङले अक्षयकोष स्थापनाका लागि सहयोग गरेका हुन् ।
चितवन सहायता कोष युकेका तर्फबाट अध्यक्ष पाण्डेले विद्यालय व्यवस्थापन समितिका अध्यक्ष जगन्नाथ कँडेललाई एकलाख रुपैयाँको चेक हस्तान्तरण गरे । कार्यक्रममा छात्रवृत्ति रकम उपलब्ध गराउने प्रक्रियामा विशेष भूमिका निर्वाह गर्ने भरतपुर–२१ का वडाध्यक्ष कृष्णकुमार गुरूङ, वडा सदस्यहरु, समाजसेवी टीकाराम दाहाललगायतको सहभागिता रहेको थियो ।
अक्षयकोषको रकम बैंकमा राखी प्राप्त व्याजमध्ये ७० प्रतिशत रकम छात्रवृत्ति र ३० प्रतिशत रकम मूलधनमा राखिने विद्यालयका प्रधानाध्यापक बटुकलाल तामाङले जानकारी दिए ।
